Թմրամոլությունից ազատվելու իմպլանտ է ստեղծվել. news.am

Աշխարհում առաջին իմպլանտն է ստեղծվել, որը թմրամոլություն ունեցող մարդկանց կօգնի պայքարել օպիոիդների նկատմամբ հակման դեմ: ԱՄՆ Սննդամթերքի եւ դեղերի որակի սանիտարական վերահսկողության վարչությունը (FDA) հայտնել է, որ արդեն կսկսվի թմրամոլների համար դրա ներդրումը:

Փոխարինիչ թերապիայի համար ամերիկացի բժիշկներն իմպլանտ են օգտագործում, որը կրճատում է թմրանյութի նկատմամբ հակումը: Այն դանդաղեցնում է նաեւ հերոինին ընտելացումը:

Լուցկու չափ ունեցող իմպլանտի կառուցվածքը բազմաթիվ առավելություններ ունի դեղերի համեմատ. դժվար է այն սխալ օգտագործել, անօրինականորեն վերավաճառել, չի կարելի մոռանալ եւ անհնար է գողանալ:  

Մասնագետները պարզաբանում են, որ արտադրանքի տեղադրումը կատարվում է այն բանից հետո, երբ հիվանդը թմրանյութերից եւ դեղահաբերում փոխարինիչներ ընդունելուց հետո վերադառնում է համեմատաբար նորմալ վիճակի:

Իմպլանտն աստիճանաբար մարմնի մեջ է ներարկում այն նյութը, որը ճնշում է օպիոիդների հանդեպ հակումը, մարդուն օգնում է կես տարվա ընթացքում հաղթահարել կախվածությունը: Ճիշտ է, կլինիկական փորձարկումները ցույց են տվել, որ որոշ հիվանդների մոտ, այնուամենայնիվ, պահպանվում է դեղահաբի կարիքը նույնիսկ իմպլանտի առկայության դեպքում:

Այսօր Ամերիկայում պաշտոնապես հաշվվում է  2 մլն-ից ավելի թմրամոլ, որոնք իրենց հերոին են ներարկում, բայց նրանց միայն կեսն է բժշկական օգնություն ստանում: Բուժման դեղամիջոցների համար մինչեւ   2 մլրդ դոլար է ծախսվում:

Որոշ բժիշկներ թերահավատորեն են վերաբերվում նման սարքերի կիրառության գաղափարին, որովհետեւ կարծում են, որ դրանց կիրառության դեպքում հիվանդները հույսը կդնեն իմպլանտի վրա` չփոխելով կենսաոճը:

Բացառված չէ, որ այդ սարքը լրացուցիչ օգնություն կբերի: Այժմ ամերիկացի բժիշկը, օրենքի համաձայն, կարող է ընդամենը 30 թմրամոլի հետեւել, որոշ դեպքերում այդ թիվը կարող է ավելացվել մինչեւ 100:

Մասնագետները կարծում են, որ իմպլանտների պրակտիկայի կիրառությունն ամերիկացի օրենսդիրներին թույլ կտա ավելացնել այդ նորմերը: Նախատեսվում է սարքը թերապիայի մեջ օգտագործել թմրամոլների վարքի շտկման եւ վերականգնման հետ միասին:

Հարցեր, պատասխաններ, մեկնաբանություններ